მიუხედავად იმისა, რომ მატჩი "მერანმა" აქტიურად დაიწყო, შეხვედრის მე-17 წუთზე "დინამო" დაწინაურდა, "ექს-მერანელმა" დათა სიჭინავამ საჯარიმოს მისადგომებიდან შორეული დარტყმით გახსნა ანგარიში - 0:1.

 "მერანელებს" წონასწორობის აღსადგენად ზუსტად 10 წუთი დასჭირდათ. 27-ე წუთზე თორნიკე კაკუშაძის საგოლე გადაცემის შემდეგ, ამირან როხვაძემ გადაგზავნა ბურთი ეხვაიას კარში - 1:1.

 35-ე წუთზე "მერანის" შემტევმა, ლევან წოწონავამ პენალტი მოიპოვა და თერთმეტმეტრიანის ნიშნულიდან თავად დაარტყა ზუსტად - 2:1.

  პირველი ნახევრის დასრულებამდე წამები იყო დარჩენილი, როცა დათა სიჭინავას მიერ შესრულებული საჯარიმო დარტყმის დროს, კიდევ ერთ "ექს-მერანელს", პაპუნა მოსემღვდლიშვილს მიუვიდა ბურთი მეტოქე გუნდის საჯარიმოში და "ზუგდიდელთა" ცენტრალურმა მცველმა ახლო მანძილიდან გაათანაბრა ანგარიში - 2:2.

 მეორე ტაიმის 76-ე წუთზე კიდევ ერთხელ გავიდა წინ "დინამო". ფლანგიდან გურამ მინდორაშვილის მიერ ჩაწოდებული ბურთი დათა სიჭინავამ თავით გაიტანა "მერანის" კარში 2:3..

"მერანი" კრისტალბეთ ეროვნულ ლიგა 2-ის მე-12 ტურის მატჩს 5 ოქტომბერს თბილისში გამართავს დუშეთის "არაგვის" წინააღმდეგ.